يوم الأربعاء اللي فات .. رحنا سيتي ستارز .. أنا واتنين أصحابي ..
واكمننا مثقفين .. دخلنا دار الشروق .. وفضلنا نتفرج ع الكتب ..
اشتريت كتابين .. " اللغة والمجاز بين التوحيد ووحدة الوجود .. للمسيري رحمة الله "
وإن شاء الله اقرأه هو وإخواته ^^
وكتاب لحظات غرق جزيرة الحوت .. للمخزنجي .. وده بعون الله هيخلص في يومين ^^
ودبست واحدة صاحبتي في كتاب البستان للمخزنجي ^^
عشان الميزانية كانت خرمت :(
وهم كل واحدة فيهم اشترت كتابين ..
واحدة اشترت كتاب ليحي حقي .. وكتاب عبارة عن تدوينة مطبوعة اسمه .." ارز بلبن لشخصين"
التانية اشترت نفس الكتاب .. وكتاب تاني مش فاكراة .. باللإضافة للبستان ^^
واحنا خارجين كان فيه واحد بيعزف على بيانو
شكلهم مأجرينه بالساعه !
وقفت وقلت لهم أنا نفسي أروح أعزف
استنوا أروح اقول لعمو يخليني العب شويه ع البيانو
بس للأسف حرموا نفسهم من سماع مقطوعتي الموسيقية
هم الخسرانين <_<
------------
لفت نظري كتب كتير .. عبارة عن مدونات أو تدوينات مجمعة !
منهم " أنا عايزة أتجوز " ودي أول مدونة عرفتها أساسا ..
وأول ما نزل الكتاب عملوا له ضجة جامدة .. كنت بافكر اشتريه :D
و " ارز بلبن لشخصين " .. و و و و ...
تخيلوا لو كل المدونين نشروا مدوناتهم ^^
ماشاء الله مصر مليئة بالكتَّاب
أي نعم الناس بتحب تكتب عن نفسها !
والناس التانية بتحب تقرأ عن الناس الأولانية ..
بس يعني مش هتوصل لدرجة إني أشتري كتاب عبارة عن مدونة شخصية !
مش لأنه عيب ولا حرام .. بس مش فراغ هو .. ما أكتب أنا كمان زيهم ^^
محدش يفتكر إني باحقد عليهم عشان مدوناتهم منشورة وأنا لأ .. !
كنت باقول لأصاحبي .. طالما بتحبوا تقرأوا الكتب دي ..
هابقى اطبع لكم المدونة بتاعتي في كتاب حاضر ^^
وأهو أنا أولى بالفلوس اللي بيدفعوها برضه ^_^
هناك 7 تعليقات:
الله ينور عليكي يا سمسمة بجد.
مع كامل احترامي لمدونة عاوزة أتجوز وغيرها من المدونات،صعب أوي فكرة تحويل المدونة لكتاب
أنتي عارفة لو جيتي عندي المدونة حتلاقي ناس كتير أوي أوي طالبين مني أني أحولها لكتاب عشان مغامراتي في إنترفيوهاتي
مش مغامراتي في العرسان
:)
بس أنا الصراحة مش متحمس كفاية للفكرة
مدونتك تستحق المتابعة
تحياتي
أهلا بيك يا مايكل .. ويسعدني متابعتك للمدونة :)
قبل تعليقي دخلت مدونتك ..
وقرأت الموقف بتاع الكلب اللي ف المطرية
أنا مؤخرا بدأت تظهر عندي أعراض فوبيا الكلب برضه :D
----------
أصل لو كل واحد دلوقت اتجه لطباعة مدونته .. ونظرا لإن الإسلوب بيبقى ممتع وشيق ..
تفتح الكتاب من دول يغريك إنك تشتريه .. هتستمتع بيها شويه !
طيب وبقية المجالات اللي انت محتاج انك تقرأ فيها فعلا !
أعتقد في حاجات أولى !
والتدوينات دي مكانها المدونة نفسها ..
ازيك يا سمسمة، تفتكري ان فكرة طباعة المدونات دي فكرة كويسة.
على حد علمي المدونات دي غالبا افكار وكتابات شخصية وحاليا لا ترقى لمستوى القصة او الرواية او حتى التحقيق الصحفي ولو انهم عملوا دعوة لمدون سعودي من فترة قريبة مع مجموعة من المدونين لحضور قمة السبعة.
عموما التدون حاجة كويسة بس انا بعتبرها يوميات او مذكرات او حديث النفس
هلا أبيه :D
مش كلها أكيد تستحق الطباعة ..
يمكن لأن في جزء ولو بيسط منها مش تدوينات شخصية .. وإن كانت فكرة المدونة كما يبدو لي .. زي ما قلت ما هي إلا أفكار و كتابات شخصية ليس أكثر !
بس هي إيه بقى قمة السبعة دول ؟ :D
ازيك ياسمسمة عاملة ايه
كتاب اللغة والمجاز ده الواد أحمد عبد الفتاح اشتراه قدامي, بس انا كسلت أجيبه أصل صراحة دماغي على قدي, كبيري مع المسيري اقرا موسوعة اليهود ودا بس عشان أكيد مليانة صور ومسلية
ياللا ربنا يوفقك
الحمد لله بخير .. كيفك يا فندم ؟؟
حضرتك مقولتش رأيك في موضوع نشر المدونات الشخصية .. مع ولا ضد ؟؟
كتاب اللغة والمجاز كتاب كتاب رائع ع فكرة .. أنا مقرأتش الموسوعة لسه .. إن شاء الله أقرأها لما أخلص اللي عندي الأول .. يعني بعد كام سنة كده ^^
hiiii
انا راى ان مش حاجة وحشة ان المدونة تبقى كتاب .....حلو ان الواحد يسمع و يشوف تجارب و اراء ناس تانية فى الحياة ....
إرسال تعليق