حمد الله على سلامتي
يوم الثلاثاء 19 اغسطس كان حتة يوم عمري ما هانساه
بداية من حربي الضاريه ضد الصراصير وانتصاري عليهم
مرورا بكوباية الشاي اللي شكله فعلا على رأي يوسف
في صرصار فدائي رمى نفسه فيها عشان ينتقم
الى مشوار الجيزه اللي كان لازم اعمله امبارح
بعد ما شربت كوباية الشاي بشويه حسيت بحاجات غريبة
جسمي مكسر وسخونيه وعيني مزغلله وريقي ناشف
فضلت قاعده لحد الساعه 5 صليت العصر ونزلت
واخدت معايا ازازة ميه متلجه وقررت اني هاروح المشوار بتاع الجيزه
لانه اخر فرصه النهارده ومينفعش أاجله لأني متفقه مع الست النهارده
مش عارفه نزلت السلم ازاي وعديت الشارع
طيب هاركب ايه بقى دلوقت عدى سي تي ايه مكتوب عليه الجيزه
اركب ولا
الاوتوبيس مشي 
بعد شويه اوتوبيس تاني جه الجيزه برضه ماهو انا لازم
اروح بس هو المكان مش في الجيزه بالضبط طيب اطلع واسأل السواق .
ركبت ...
"عمو لو سمحت عايزه اروح عند المطبعه"
"انزلي الاخر واركبي حاجه تاني من هناك بتروح الهرم"
"طيب يا عمو شكرا" دخلت وقعدت جسمي لسه مكسر وصداع رهيييييب مسكني
اغمض عيني الصداع يروح شويه ويرجع تاني افتح عيني نفس النظام وهكذا
مش قادره اتحرك من مكاني مش عارفه هانزل ازاي
" بعد اذنك يا انسه" البنت اللي جانبي كانت نازله ااااااااه ياني يعني هاقوم طيب
نزلتها وقعدت الجو حررررررر جدا والمفروض ان الاوتوبيس مكيف
وصلنا الاسعاف الدنيا زحمه والطريق واقف ببييييييييب بيب بييييب حرام مش قادره
يارب ارحمني وصلنا التحرير وعديت من جنب اسدين قصر النيل منظر النيل جميل اوي
خفف عليا شويه وفضلنا ماشيين ايه ده البرج انا عمري ما رحته ان شاء الله ابقى اعمل
جوله سياحيه في انحاء القاهره لو كان ليا عمر دار الاوبرا كمان بس انا مش باحب الاوبرا اصلا
هاااه يارب هاوصل امتى .... جامعة القاهره قربت خلاص حديقة الحيوان هانت مفاضلش كتيير
"ايوه الاخت اللي عايزه المطبعه "
" ايوه يا عمو ثواني واكون عند حضرتك "
"اركبي الاوتوبيس الكبير اللي ورا اللي بيقول الهرم ده"
"طيب شكرا يا عمو"
نزلت " هرم هرم .. هرم رمايه هرم "
"بتعدي على المطبعه لو سمحت "
"اه اركبي "
"طيب لما تيجي ابقى قولي "
ركبت وقعدت .. بعد شويه
" ربع جنيه كمان لو سمحت "
" لأ الاجره 75"
خناقه
ياربي انا ناقصه " باقولك الاجره جنيه يا استاذ"
"انت حمار ولا مبتفهمش الاجره 75 "
السواق " هو مغلطش فيك يا استاذ بيقولك الاجره جنيه "
" الاجره 75"
"الناس دي كلها راكبه بجنيه الاجره بكام يا جماعه "
محدش رد
" الاجره جنيه من الجامعه والجيزه كمان"
"ولا انت متعرفش انا ممكن اعمل ايه ادي الناس دي كلها فلوسها "
السواق " خلاص يا استاذ
"لأ مش خلاص باقولك ايه اطلع بينا عالقسم "
وسكتوا بعد شويه " اقف على جنب هنا "
" ياله انزل "
"انزل فين يا استاذ"
"انزل قدامي عالقسم "
" لأ مش هانزل خلاص يا استاذ"
" طيب انت فاكرني مش هاعرف اجيبك "
" العربيه دي بتاعتك ولا شغال عليها "
.....
"رد عليا باقولك العربيه دي بتاعتك ولا شغال عليها "
"شغال عليها "
بعد شويه خلاص هينزل وهو نازل زق التباع حتة زقه
" بعد كده ترد عليا كويس وباحترام "
الواد مردش عليه
السواق " ده شكله بخيل اوي "
"ياعم انا كنت هانزل معاه القسم اصلا ده كان ممكن يصعب عالضابط ويديله الربع جنيه "
" وانا كمان فكرك كنت خايف بس عشان العطله والفرده متبوظش "
سالت طنط اللي جنبي "هي المطبعه قربت "
"مش عارفه قوليله لما تيجي يقولك "
"ما انا قولتله بس شكله نسي "
" لو سمحت يابني ابقى نزلها المطبعه "
بعد شويه واحده طالعه بكراتين كده الست اللي جنبي " حسبي راسك يا بنتي "
وعدت من جنبي بسلام
شويه تاني وطلعت قدام وطاااااااخ
الكراتين خبطت في نافوخي ااااااااه هو انا ناقصه
"ايوه اللي عايزه المطبعه "
نزلت الحمد لله طيب هو فين بقى
قعدت ابص حواليا مش شايفه حاجه
" لو سمحت معهد الاي تي أي "
"ايوه اهو الناحيه التانيه عدي من الممر ده"
"شكرا "
اخيرا وصلت عند باب الامن " سلام عليكم مدام فلانه موجوده"
"لأ مش موجوده ..ثواني كده شوف كده مدام فلانه موجوده ولا مشيت"
"لأ مشيت يا انسه "
ياربي بعد كل ده " طيب ممكن اسيب لها حاجه حضرتك تديهالها بكره ضروري "
"طيب حضرتك دخليها الاوضه دي "
"طيب متشكره اوي "
اكلمها بقة عشان ابلغها التليفون بيرن ومحدش بيرد اكلمها بكره
طريق العوده . . اروح ازاي بقى اركب تاني للجيزه ومن الجيزه للبيت
استنيت الميني باصات زحمه
رمسيس رمسيس رمسيييييييس
ايه ده في رمسيس من هنا احمدك يارب
اركب لرمسيس ومن رمسيس ربنا يحلها بس امشي من هنا
ركبت تالت مره اه يا جسمي ااااااه يا دماغي
بعد شويه لقيت اللي بيخبط من ورا . جسمي مش مستحمل " اديله الاجره لو سمحتي "
حاضر حاضر بالراحه
( تصحبكم السلامه... مع تحيات حي العمرانيه )
"ايوه ايوه انا مش سامعك انت سامعني انا في الجيزه "
يعني انت مش سامعه بتعلي صوتك انت ليه خرمت ودني حرام عليك
"شويه وواحده طنط ركبت هي وجوزها وشكلهم اكيد رايحين فرح بالفرح اللي طنط لابساه
قعدت قدامي عيني بتوجعني اوي ترتر ترتر ترتر وخرز خرز ازرق ولبني وبرتقاني مش شايفه حاجه
بعد شويه عمو جوز طنط جاله تليفون " ايوه يا حاج احمد احنا في السكه اهو طيب سلام"
عمو كان قاعد ورايا وطنط كانت قاعده جنبي وبدأ بينهم هذا الحوار
عمو "بيقولك الزفه هتبدا الساعه 8 والساعه دلوقت 7 وتلت "
طنط "طيب قولهم يتصوروا الاول احسن"
عمو "ماهمه احتمال يتصوروا الاول "
طنط " لأ همه هيتصوروا الاول"
عمو " ما همه شكلهم هيتصوروا الاول "
الاوبرا والطريق واقف .... مااااء مااااء بيب بيييييييب مااء
ايه ده في ايه ... عربية خرفان على شمالي والعربيات شغاله من كل حته
فاضل كتير قربنا عالتحرير ايه ده كاريته
نفسي اركبها اوي واقعد بقى اغني الجوز الخييييييييل والعربيه بس مكانش في غير حصان واحد بس
يا بنتي انتي في ايه ولا في ايه دلوقت
النيل تاني نيل ايه وبتاع ايه دلوقت والناس واقفين اتنينات اتنينات اللي واقف مع المدام واللي مع اخته واللي مع خطيبته
لسه كتير المغرب بيأذن "الله اكبر الله اكبر " يارب ارحمني وعدي اليوم على خير يارب
قربنا نوصل
وصلنا ياله يا جماعه الاخر عشان هالف من هنا
كله كوم ومن رمسيس لبيتنا كوم تاني خالص .....
نزلت وبقيت مش قادره اتكلم امشي ازاي فضلت ماشيه ماشيه جامع الفتح اقامة الصلاة.
كان نفسي ادخل اصلي بس مش قادره هاصلي لما اروح
ايه الزحمة دي ايه ده البلديه عربيه محمله عربية فول وكراسي كتير كده
فضلت ماشيه ماشيه من غير هدى " حدش شاف هدى"
الف حوالين نفسي مش قادره اسأل حد بعد شويه لقيت عسكري قدامي
" لو سمحت فين الميكروباصات اللي بتروح جسر السويس"
"مش عارف والله "
" طيب شكرا "
قعدت اتمشى شويه لقيت واحده " لو سمحتي يا انسه الميكروباصات اللي بتروح جسر السويس فين "
"عند الجامع اللي هناك ده "
يا نهاااار ده انا لسه جايه من هناك هامشي هناك تاني " طيب شكرا "
رحت عند الجامع تاني ..
اول عباس ومكرم .. سابع سابع .. ثامن وعاشر
كله كده هو مفيش حاجه بتروح عندنا ولا ايه
" لو سمحتي يا انسه هو في حاجه من هنا بتروح جسر السويس "
"اه في اكيد "
لقيت واحد دخل في النص هو انتي عايزه تروحي فين
"عايزه اروح جسر السويس "
"اوتوبيس يعني "
" أي حاجه "
"اه في اتوبيس بيعدي من هنا بيروح جسرالسويس "
"طيب متشكره اوي "
ورجعت لورا عند السور وسندت عليه مستنيه الاوتوبيس
لقيت الرجل اللي كان بيكلمني من شويه جاي يقولي" انتي رايجه جسر السويس "
"ان شاء الله "
" طيب انتي ممكن تركبي الميكروباص بس هو مش بييجي من هنا "
" طيب ياريت هو بييجي من فين "
قلت هيشاور لي عليه لقيته مشي .. طيب خليني ماشيه وراه
" اصل انا كمان رايح جسر السويس بس الاوتوبيس شكله بيتأخر والميكروباصات بتبقى كتير "
" انتي بتدرسي ولا مخلصه " ... "لأ مخلصه يا عمو "
"طيب برافو عليكي مخلصه ايه " ... " مخلصه ليسانس اداب "
" طيب برافو عليكي انا اسمي ...( مش فاكره اسمه ) شغال مش عارفه ايه كده في مش عارف ايه
يا عم ابوس ايدك سيبني في حالي احسن انا مش فايقه " طيب كويس "
مراتي ميته بقالها سنه ونص " البقاء لله " .." وابني هيثم عنده 11 سنه "
" ربنا يخليه لحضرتك "
"خلاص اقفي هنا الميكروباص بييجي من هنا "
"انتي عندك كام سنه " ... "21 سنه"
" وانا بقى تديني كام سنه " ... وحياة ابنك مش فايقه اديك 10 سنين سجن " مش عارفه يا عمو 45 "
لقيت وشه قلب كده" لأ 45 ايه" ... " معلش يا عمو مبعرفش اسنن حد "
هاه تديني كام سنه " 40 سنه يا عمو " .. "لأ 41 سنه ده انا شكلي كبير بقى "
يا عم ابوس ايدك امشي من وشي اسيبه وامشي ..." تسمحيلي نكون اصدقاء طريق "
اصدقاااء ايه ياعم امشي من وشي الساعه دي " وماله يا عمو حضرتك زي والدي "
" لأ والدك ايه هو انا شكلي كبير كده " ....." طيب اعتبريني زي اخوكي "
هو انت منهم ... "بصي عشان انا اكبر سنا انا هادفع لك بقى " " لأ يا عمو مينفعش طبعا "
" مش احنا اصدقاء طريق ولا انتي عايزاني ازعل " ... يارب...يا عم انت حد مسلطك عليا
"طيب ايه رأيك لو نركب لميدان الحجاز ونبدل تاني من هناك لان الميكروباصات هنا الناس بتركبها بالزق"
" وانا مش باحب اركب كده انتي بتحبي تركبي كده " ...
" لأ يا عم " ..." يظهر ان فيكي طباع زي طباعي "
اسيبه وابعد " انتي متضايقه ولا ايه انا عايز بس نبقى اصدقاء طريق اصلي وحيد ونفسي اتكلم مع حد ..انا
اسمي...." قالي اسمه بتاع 3 مرات وكل مره مافتكروش "طيب يا استاذ ... " ... " لأ استاذ ايه قوليلي يا فلان
على طول فرق السن بينا مش كبير."
حسبي الله ونعم الوكيل اصل مراتي ميته من سنه ونص وابني هيثم صغير " ابوس ايد هيثم ارحم امي وابعد عني
" اتوبيس جه اهو رايح الحجاز " ... سيبته يركب وبعدين قمت مشيت اخيررااااا
الحمد لله يارب خلصت منه ... بعد شويه لقيته نزل وجاي
" انتي مركبتيش ليه " ... " طيب خلاص نركب ميكروباص اهو ميكروباص فاضي "
ركبت " متدفعيش بقى هاه عشان انا اكبر منك ... ركبت وحطيت الشنطه "انتي مبتتكلميش ليه ":huh:
" معلش يا عمو اصلي تعبانه ومش قادره اتكلم "
" اصلي شوفتك هاديه وانا مراتي ميته من سنه ونص وابني هيثم الصغير ......تاااني "
" لو انتي متضايقه خلاص " ... ااه متضايقه وياريت تقفل بقك بقى خااالص
طيب تعتبرينا اصدقاء طريق ولا اصدقاء على طول
ياعم اصدقاء ايه مين اللي قالك اننا اصدقاء اصلا
"ربنا يسهل يا عمو " يا عم انت انا انزل من الميكروباص في الليله دي ومشوفش خلقتك تاني
"اللي يريحك لو عايزه نبقى اصدقاء طريق بس ولو عايزه نبقى اصدقاء على طول "
"ان شاء الله يا عمو " ... " تعاهديني " ...
ولقيته فاتح ايده طيب سلمي
لأ لحد هنا بقى واقفعمال تتكلم تتكلم وانا ساكتالك من الصبح وانت على رأي كوكو عايز ابو ورده يزغد فوق دماغك
"معلش يا عمو مش باسلم" ... " عادي مفيهاش حاجه احنا اخوات " ....
"لأ يا عمو اسفه قلت لحضرتك مش باسلم "
" انا كده هازعل " .. اتفلق
" طيب على جنب يا اسطى لو سمحت " ونزل قبل العباسيه " .... في 60 سلامه
الحكايه كانت نقصاك اصلها .. هتقولولي انتي اللي غلطانه من الاول
اقولكم اني كنت في حاله ربنا وحده هو اللي يعلم بيها ولو كنت فايقه كان هيبقى في تصرف تاني من الاول
المهم فضلت راكبه وصلت عند جمال عبد الناصر مش قادره اخد نفسي
خلاص انا كده فصلت طول الطريق دايخه ومن الصبح على كوباية الشاي المسممه وازاة الميه
مش هاقدر اكمل الطريق
اعمل ايه يارب اكلم اخويا عالتليفون اخليه يستناني عالمحطه
كلمته " ايوه يابني انت فين " .. "انا في البيت" ... لأ بلاش احسن يعمل لهم قلق في البيت
" طيب خلاص انا جايه في السكه " .... لأ مش قادره اتحمل بدأت انهار بجد اترميت عالكنبه اللي قصادي
وكل شويه افتح عيني عشان أتأكد اني لسه عايشه
مش هينفع كده انا هاكلمه وخلاص مش قادره امسك التليفون " رفعت التليفون وكلمته "
الو معلش يا بني استناني على المحطه عشان تعبانه ومش قادره امشي "
" طيب اول ما تقربي توصلي رنيلي " ... " طيب سلام"
وصلت .. نزلت المحطه لقيت الكرسي فاضي قعديت عليه وانا باتطوح ومستنيه اخويا ييجي
اخيرا جه وسندني لحد البيت واول ما وصلت البيت اترميت عالسرير دماغي عالمخده ومخده تانيه فوق نافوخي
خبط خبط شغال عايزه انام مش لاقيه النوم
تليفون جه طيبه موجوده ؟؟؟ هي نايمه
بعد شويه ناديت على اخويا مين كان عالتليفون واحده صاحبتك
بيور اللي كلمتني
زي ما يكون قلبها حاسس قالت تلحقني قبل ما اسلم
طيب هات التليفون قلت اكلمها لاني كنت متفقه اروح لها بس شكلي مش هالحق اروح لها
الهانم منطقتنيش الشهاده قبل ما تقفل السماعه
اتشاهدت وبعد كده مدرتش بنفسي الاتاني يوم
وبعد كل ده
ادعولي بقى ان الموضوع يتم على خير وامتحن وانجح وبكده مشوار الجيزه ده هيبقى كل اسبوع مرتين عالاقل
ولو مانجحتش هيصعب عليا اليوم ده اوي
