وأنا بامارس عادتي المفضلة _ النظر للسماء _ لقيت طيارات ورقية
طايرة فوق .. فوق في العالي أوي
عجبتني أوي وفضلت مركزة معاها
كان نفسي أطير زيها
وأفضل طايرة لفوووق
من غير ما حد يتحكم فيا
حاليا عندي رغبة ملحة بالسباحة في الهوا
أيون سباحة !
جربوا كدا غمضوا عنيكوا وتخيلوا انكم بتعوموا في الهوا
----------------------------
إمبارح وأنا مروحة لقيت 4 أطفال ماشيين مع بعض
تقريبا إخوات
بنتين وولدين .. الولدين أصغر بمراحل
كانوا ماشيين عالرصيف المقابل
الولدين كانوا عمالين يتشقبلوا عالرصيف
" فكروني لما كنت باعمل الحركة دي زمااان في بيتنا :D "
بعدين وقفوا وبنوته منهم مسكت أخوها وفضلوا يلفوا ويدوروا
افتكرت لما كنا بنلعب وبنروح الجونينه زمان
ألا ليت الطفولة تعود يوما
------------------------
أول أولة إمبارح .. ركبت المترو ونزلت رمسيس
وأنا طالعة من المحطة
لقيت اتنين ستات كبار
لابسين عباية سودا وطرحة سودا كبيرة
وشكلهم جايين من البلد
جم عند السلم الكهربا
وقفوا قدامة وخايفين ينزلوا من عليه
كان معاهم واحد قريبهم
فضل يشجعهم ويقولهم متخافوش
وأنا كنت نازلة من جنبهم وحاولت أشجعهم
قاموا لفوا ونزلوا من السلم العادي
كانوا عاملين زي الأطفال :D
هناك 4 تعليقات:
السلام عليكم
ليت الطفوله تعود لو حتى نص يوم
ولا حتى من العصر للمغرب
قلبتى اللى جوه خالص
فكرتينى بأيام كنت محتاج انى افتكرها دلوقت حالا
علشان اطلع من المود أياه.... :)
بصى بقه انا كنت احسن واحد بعمل طيارات فى الشارع ايام ما كنت صغير
ولسه لحد دلوقت بعمل طيارات بس لأطفال العائله الكريمه طبعا وسعات كده بياخدنى الشوق وأجرى على البحر وأطير طياره
شكرا على البوست الرقيق ده
.
.
.
يا ريت تقبلينى زائر دائم لهذه الروضه الجميله :)
ورده كبيييييييييره خالص لمدونتك يا قمر
ازيك يا سامية
جميلة الفضفضة ,ان الواحد يعبر عن نفسه ويقول أمانيه وطموحاته وكل اللي نفسه فيه بدون تردد
انا للأسف معنديش رغبة في السباحة
أنا نفسي اشرب كوباية شاي فورا
أقدم عاصمة في الحب :
وعليكم السلام ورحمة الله وبركاته ..
لسه إمبارح ابن أخويا كان بيطلب مني أعمل له طيارة .. بس اشترينا له واحده جاهزة :)
وأهلا بحضرتك يا فندم :)
سيدي الرئيس :)
أنا الحمد لله تمام .. كيفك ؟
جميل إن الواحد يعبر عن نفسه ويقول أمانيه وطموحاته وكل اللي نفسه فيه بدون تردد ..
بس بعدين هيصتدم بالواقع ويلاقي إن مفيش حاجه من دي هتتحقق !!
حالا يا فندم والشاي يكون جاهز :D
إرسال تعليق