التقرير الثالث

جميل وأسمر ..

عدت لتوي من الخارج ..

حيث كنت أنا ومحمود ..

استقلينا ميكروباص من ميدان الحجاز ..

وقف بنا فترة ليست بالقليلة في ميدان الألف مسكن ..

وسط تذمري وتذمر الركاب لوقفتنا في هذا الجو شديد الحرارة ..

وجهت ناظري للجهة المقابلة ..

لمحته يتقافز وهو ممسك بيد رجل .. أظنه أباه ..

كانت ابتسامة جميلة تعلو قسماته..

تعلق نظري به .. ولحسن الحظ ..

كان متوجها للميكروباص الذي نستقله ..

صعدا .. وجلس الأب بجانب فتاة في مقعد أمامنا ..

وفوقه كان يستقر ولده ..

كان هذا الصبي أسمر اللون .. جميل الملامح ..

تقريبا ف الثانية عشر من عمره .. أو دون ذلك

ينظر للفتاة ويضحك .. ويعاكس الركاب بجانبه ..

مازال نظري معلق به ..

بدت منه التفاته جهتي ..

ابتسمت له .. كانت الراكبه أمامي أيضا تنظر له وتشير إليه ..

أشار اليها .. ثم نظر إلي وأشار لي وهو يبتسم ..

أشرت له بالمثل .. حان وقت نزولنا ..

لم أكن أريد النزول ..

شعرت بسعادة غريبه في قلبي .. لا أجدها إلا مع هؤلاء

تذكرت منار ..

ثرثرة.. لا بد منها !

ثرثارة أنا ! أعرف

لذا أحذرك أيها القارئ العزيز قبل الشروع في القراءة .. ومن ثم صب جام غضبك ولعناتك علي ..

إنها مجرد ثرثرة .. ومنها محاولة لاستجداء قلمي واسترضائه لمزاولة الكتابة ..

--------------------

أنا مش بتعلم من أخطائي ! ..

---------------------

محمود .. بيبقى حد جميل أوي لما يسمع الكلام .. النهاردة ضحكت لصوت ضحكته .. ربنا يهدينا وإياك يا حوده ..

---------------------

حلو أوي إنك تشتغل مع حد ويحسسك إنه بيخاف عليك وعايز مصلحتك من نصايحه ليك

وحش جدا إنك تلاقي إن الحد ده يكون أول واحد يحطك ف وش المدفع أول ما يلاقي إن في غلط ف الشغل حتى لو كان الغلط ده مش إنت السبب فيه !!

---------------------

" ذنب ناس بتخلصه ناس "

افتكرت الأغنية دي اللي معرفش منها غير الكلمتين دول ! ..

أصل ربنا مبيرضاش بالظلم .. واللي اتظلموا كتير ..

يمكن تكون هي كمان اتظلمت ..

بس مش معناه إنها تقابل الظلم بظلم أكبر لناس ملهاش ذنب ! ..

بس عشان تخرج الظلم اللي هي حساه ف صورة شر و أذية والمشكلة إنهم في ناس كانت بتساعدها على كده !!

.. كنت متوقعة النهاية .. بس مكونتش أعرف إنها هتيجي بسرعة كده ..

وهتبقى شديده أوي كده ..

يمكن ساعات بحس إني فرحانه .. بس مش فيها .. فرحانه لإنها خلاص مش هتقدر تتجبر على حد تاني ..

كان لازم تبقى عارفه م الأول إن لكل ظالم نهاية !! ..

-----------------------

نعمل فلاش باك شهرين ونص تقريبا *

في وقت كنت لسه بقرأ فيه الجرنال .. خاصة المصري اليوم ..

( اصطباحة بلال فضل _ الحوادث ) وبقية الجرنال لو في وقت ..

في الفترة دي كانت كل الحوادث عبارة عن جرائم قتل بشعة .. المذيع قاتل مراته .. الشاب قاتل والده ....

حتى الكلاب الضالة قاتلة طفل صغير أمام والده ..

ومن قبلها و إلى الآن وأنا أخاف الكلاب بجميع أنواعها وأحجامها ..

الوقت ده خيالي المريض كان بيصور لي حاجات غريبه ومجنونة ..

وكان بيساعد على كده إني كنت بروح الشغل بدري لوحدي ...

-------------------------

عندما تتطوع لأداء خدمة معينة .. يجب أن تدرك أنك أصبحت ملزم بأدائها كل مرة* !

--------------------------

عارفه إن النوته محتاجه تتظبط كتير .. بس عشان بكتب م الموبايل .. وافتكروا إني لم أجبر أحد ع القراءة ..

--------------------------

25/9/2010

هن _ هم _ أنا

<< هُنَّ >>

اكتشفت اكتشاف ليس بالخطير ..

أنَّنا _ معشر الفتيات _ عندنا فايض ف العواطف والمحاسيس !
تلاقينا بنبالغ أوي في إظهارها ..

محدش يقول لي .. " هأ .. قديمة " حسسوني إنكم أول مرة تعرفوا :P
أحيانا .. بيكون من باب مجاملة !
وأحيانا .. باب المجاملة .. فصل النفاق :D

بس كتير أوي بتكون من قلبنا بجد !
بعضنا اتعود إننا لما نشوف بعض لازم نقعد بتاع ربع ساعة حاضنين ف بعض !
و10 دقايق بنبوس ف بعض .. حتى في نهاية اللقاء !
كأنه دواء .. :D

هو ده ف حد ذاته مش غلط .. ومش عيب !
وأنا نفسي بعمل كده .. !
بس حسيت إنه كتير .. خاصة مع الناس اللي ملكيش علاقة بيهم أوي !



على الجانب الآخر ..

<< هُمْ >>

تلاقيهم أما يتقابلوا سلام ف السريع كده معندهمش وقت يابا !
والعلاقات فيما بينهم _ اللهم لا حسد يعني _ لا يشوبها أي توتر ..

اللهم نادرا ...
وده يمكن عشان بيقولوا يعني إن مخهم كبير " أقصد عقلهم يعني " ..

وموضوع العواطف والمحاسيس ده يعني يا دوب عندهم إكتفاء ذاتي ..

وفي اللي بعيد عنكم _ بعيد النظر _ معندوش محاسيس :D

زي ما بيقولوا كده .. عقلانيين !


على الجانب الـ .. جانب إيه ؟! هو مفيش غير جانبين !

<< أنا >>

هحاول أتمرد على طبيعتنا !

بجد .. بقيت أكره تجمعات البنات !
بس مش كل التجمعات :D

خلاص اتخذت قرار حازم .. حاسم .. صارم !
إني أنضم لإخوانا الرجال ف الجزئية دي !

أبقى _ وبدون زعل _عقلانية شوية ف التعامل مع البنات !

بلاش ربع ساعة حضن !
نخليه 5 دقايق ف الشتا .. ودقيقة واحدة كفاية ف الصيف :D

قرار أخذته وإدعوا لي بجد أنفذه !

هو ده _ مش _ كل اللي عندي ..

سلام حتى حين !

يحيى

فجر يوم 90/1/2010
اتولد يحيى حازم 3>
وبقوا ربع دستة أشرار :D
أول حد يتولد بعيد عننا وأول لقاء بينا إن شاء الله هيكون بعد 4 شهور تقريبا ..
المهم ييجوا بالسلامة يارب ..

ربنا يخليه لمامته وباباه ويتربى ف عزهم هو وإخواته ^^