في وندر لاند

يوم من ايام ربنا ..

وانا مروحه بيتنا من الكلية ..

لقيت اختي نازله .. باقولها على فين ..

لقيت ماما بتقولي روحي معاها ..

قولت لها رايحه فين ..

قالتلي اصل صاحبتي عزماني على وندر لاند ومدياني تذاكر لكذا فرد ..

ومكانش في غيري في البيت ..

قالت تكسب فيا ثواب وتاخدني معاها ..

المهم زي ما انا نزلت معاها .. قلت اهي خروجه ببلاش وخلاص ..

وصلنا وندر لاند .. كنت اول مره اسمع عنها اساسا ..

دخلنا وقعدنا شويه ..

شويه وصاحبتها قالت لنا تعالوا نركب اي حاجه ..

انا اول مرة اركب الحاجات دي اصلا ..


اخري مراجيح وان كان عربيات التصادم بس مش لوحدي :D

المهم احنا كنا روحنا بدري شويه فكان الو هادي ..

لقينا حاجه كده اسمها من شكلها باليرينا ..

ركبنا احنا الاربعه انا واختي وصاحبتها وصاحبة صاحبتها ..

وانا باقفل الباب لقيته سهل الفتح .. يعني ممكن يتفتح لوحده ..

الراجل بدأ يشغلها .. وشكله كان مستقصدنا بجد ..

لانه كان عمال يزود السرعه ويرفعها لفوق اوي ..

وبدأت لا اراديا اصوت زي بقية البشر ..

كنت خايفه اوي وحاطه ايدي عالباب لاني كنت من عالحرف ..

واي حركه ممكن يتفتح ومع السلامه ..

المهم نزلنا وحمدت ربنا ..

المهم ان صاحبة اختي قبل ما نركب بتقولنا دي مفيهاش حاجه ..

وبعد ما نزلنا كان هاين عليها تعيط ..

قعدنا شويه .. قلت مش هاركب حاجه تاني ..

لقيت صاحبة اختي بتقولنا يا جماعه مينفعش كده انتوا جايين تقعدوا ولا ايه ..

اختي قالت لي قومي نركب البتاع اللي هناك ده ..

حاجه كده المفروض انه قطار الموت ..

ركبنا وانا حاسه ان روحي كانت هتطلع ..

المهم رحت قعدت وهم عايزن يدخلوا بيت الرعب ..

قلت لهم مش هادخل يعني مش هادخل ..

المهم دخلوا لقيت اختي طالعه بتضحك وتقولي قومي ادخلي مش بتخوف ..

قلت لها انا مش عايزة ادخل ..

بعد شويه صحبتها مصممه اننا نركب حاجه ..

لقيت حاجه عالمه زي المقص .. قلت استحاله اركبها ..

بس افتكرت وانا داخله لقيت حاجه كده عامله زي المنخل ..

كان فيه ناس جواه وهو عمال يتهز بيهم بالراحه وكلهم رجاله وستات كبار ..

قلت ده كويس ومفيهوش مخاطر ..

خلاص خلاص هاركب البتاع ده ..

اختي وصاحبتها سابوني اركبه لوحدي ..

بس وانا باركب كان في عيال كتير كده ولاد وبنات ..

كانت رحلة مدرسية وكان معاهم المدرس بتاعهم ..

المهم المنخل بدأ يتحرك عامل زي المنخل فعلا ..

الراجل بيحركه فوق وتحت ويمين وشمال ..

حسيت بالمعاناه بتاعة الدقيق ..

بعد شويه لقيت العيال كلهم وقعوا عالارض ..

وشوية كمان المدرس وقع وبقت هيصه ..

مبقاش غيري انا الوحيده اللي قاعده ..

شويه ولقيت الراجل عمال يهزه جامد اوي ويرفعه لفوق وانا قاعده ومتبته في الماسورة ..

وكنت هاعيط وابص الاقي الناس كلها متجمعه تحت وعماله تتفرج ..

وبقيت كل ما اجي ناحية اختي اقولها خليه يوقفها .. وهي مش سمعاني ..

والراجل كل شوية يزود السرعه ويحركه جامد ..

وانا فضلت ماسكه في البتاع لحد ما ايدي وقفت ..

وفييين وفين لما فقد الامل اني اقع قام موقفها ..

وانا لسه باقف وبافتح الباب وانا اعصابي سايبه عشان اخرج ..

لقيته انتهز فرصة وقوفي قام مشغلها تاني ..

قمت لحقت نفسي وقعدت بسرعه وبصيت له بنرفزة ..

لقيته بيبص لي وهو بيضحك وقالي خلاص ..

المهم وانا نازله لقيت الناس كلها عماله تبص لي ..

وانا اصلا كان هاين عليا اعيط ..

ومن ساعتها حرمت اروح ملاهي ..

ولو رحت باروح اتفرج بس ...