من غير عنوان !!

امبارح جاي في دماغي امسك الورقه والقلم واكتب اي حاجه ..

دخلت المطبخ لقيت ماما عامله فول باوطه مكانش ليا نفس بصراحه

قلت اعمل كوباية شاي واروح المقر بتاعي ..

بس لقيتني جبت نص رغيف وفتحت الحلة وعملت سندوتش

واكلته وانا باولع عالشاي ..

كان طعمه تحفه خصوصا انها حاطاله فلفل حامي ..

عملت لي سندوتش تاني كان الشاي اتعمل ..

صبيته وروحت جبت الاندكس والقلم الرصاص وطلعت السرير

الدور التاني " مكاني المفضل"

وانا باخطو اولى خطواتي على سلم السرير فوجئت بشيئ مروع :O

العديد من القتلى يا نهاااااار " سرى في جسدي قشعريرة بارده "

ايه ده بتاع 20 سوسه مقتولة عالسرير ..

ايه اللي جابهم عالسرير بتاعي :angry:

المهم طلعت السرير وقلت لاختي تناولني مج الشاي ..

وفتحت الاندكس وبدات في الكتابه وانا باكتب شميت ريحه حلوة اوي ..

اتاري الاندكس واقع عليها بارفان بقيت اكتب شويه واشم شوية ..

المهم بقى اني كنت عايزة اكتب حاجه

لقيتني باكتب حاجه غير الحاجه اللي كنت عايزة اكتبها ..

مش مهم المهم اني كتبت وخلاص .. كوباية الشاي خلصت

والمفروض اني هاقوم اصلي العشا وانام ..

وطبعا لازم انفض السرير من الميتين اللي عليه ..

نزلت وانا نازله سمعت صوت حد بره

دول جيرانه جايين يتطمنوا على ماما عشان كانت مريضه ..

طلعت سلمت عليهم وقعدت معاهم ..

وقعدنا نتكلم في حاجات كده وبعدين مش عارفه ايه جاب سيرة السرقه

والكل بيستعرض مواقفه مع الحرامية ..

لغاية ما روحوا وبعدين بقى قمت صليت العشا ونمت ..