في دار الشروق ..

يوم الأربعاء اللي فات .. رحنا سيتي ستارز .. أنا واتنين أصحابي ..
واكمننا مثقفين .. دخلنا دار الشروق .. وفضلنا نتفرج ع الكتب ..

اشتريت كتابين .. " اللغة والمجاز بين التوحيد ووحدة الوجود .. للمسيري رحمة الله "
وإن شاء الله اقرأه هو وإخواته ^^
وكتاب لحظات غرق جزيرة الحوت .. للمخزنجي .. وده بعون الله هيخلص في يومين ^^

ودبست واحدة صاحبتي في كتاب البستان للمخزنجي ^^
عشان الميزانية كانت خرمت :(

وهم كل واحدة فيهم اشترت كتابين ..
واحدة اشترت كتاب ليحي حقي .. وكتاب عبارة عن تدوينة مطبوعة اسمه .." ارز بلبن لشخصين"
التانية اشترت نفس الكتاب .. وكتاب تاني مش فاكراة .. باللإضافة للبستان ^^


واحنا خارجين كان فيه واحد بيعزف على بيانو
شكلهم مأجرينه بالساعه !

وقفت وقلت لهم أنا نفسي أروح أعزف
استنوا أروح اقول لعمو يخليني العب شويه ع البيانو

بس للأسف حرموا نفسهم من سماع مقطوعتي الموسيقية
هم الخسرانين <_<

------------

لفت نظري كتب كتير .. عبارة عن مدونات أو تدوينات مجمعة !
منهم " أنا عايزة أتجوز " ودي أول مدونة عرفتها أساسا ..
وأول ما نزل الكتاب عملوا له ضجة جامدة .. كنت بافكر اشتريه :D
و " ارز بلبن لشخصين " .. و و و و ...

تخيلوا لو كل المدونين نشروا مدوناتهم ^^
ماشاء الله مصر مليئة بالكتَّاب

أي نعم الناس بتحب تكتب عن نفسها !
والناس التانية بتحب تقرأ عن الناس الأولانية ..

بس يعني مش هتوصل لدرجة إني أشتري كتاب عبارة عن مدونة شخصية !
مش لأنه عيب ولا حرام .. بس مش فراغ هو .. ما أكتب أنا كمان زيهم ^^
محدش يفتكر إني باحقد عليهم عشان مدوناتهم منشورة وأنا لأ .. !


كنت باقول لأصاحبي .. طالما بتحبوا تقرأوا الكتب دي ..
هابقى اطبع لكم المدونة بتاعتي في كتاب حاضر ^^
وأهو أنا أولى بالفلوس اللي بيدفعوها برضه ^_^

طيارة ورق

وأنا بامارس عادتي المفضلة _ النظر للسماء _ لقيت طيارات ورقية
طايرة فوق .. فوق في العالي أوي

عجبتني أوي وفضلت مركزة معاها
كان نفسي أطير زيها

وأفضل طايرة لفوووق
من غير ما حد يتحكم فيا


حاليا عندي رغبة ملحة بالسباحة في الهوا
أيون سباحة !

جربوا كدا غمضوا عنيكوا وتخيلوا انكم بتعوموا في الهوا


----------------------------







إمبارح وأنا مروحة لقيت 4 أطفال ماشيين مع بعض
تقريبا إخوات

بنتين وولدين .. الولدين أصغر بمراحل

كانوا ماشيين عالرصيف المقابل
الولدين كانوا عمالين يتشقبلوا عالرصيف

" فكروني لما كنت باعمل الحركة دي زمااان في بيتنا :D "
بعدين وقفوا وبنوته منهم مسكت أخوها وفضلوا يلفوا ويدوروا

افتكرت لما كنا بنلعب وبنروح الجونينه زمان
ألا ليت الطفولة تعود يوما


------------------------

أول أولة إمبارح .. ركبت المترو ونزلت رمسيس
وأنا طالعة من المحطة

لقيت اتنين ستات كبار
لابسين عباية سودا وطرحة سودا كبيرة

وشكلهم جايين من البلد

جم عند السلم الكهربا
وقفوا قدامة وخايفين ينزلوا من عليه

كان معاهم واحد قريبهم
فضل يشجعهم ويقولهم متخافوش
وأنا كنت نازلة من جنبهم وحاولت أشجعهم

قاموا لفوا ونزلوا من السلم العادي
كانوا عاملين زي الأطفال :D

يُوسُف .. حبيب قلبي

13/7/2001 يوم ميلاد أول حفيد في عيلتنا .. لأكبر إخوتي .. أبيه حازم ^^

اليوم 13/7/2009 أتم يوسف عامة الثامن ..

إن شاء الله

13/7/2022 نحتفل بتخرجه من كلية الهندسة ^_^

نصفي الآخر

أشْعُر بأَنَّها مِرْآتي ..
أُحِبُّها لِذَاتِها وتُحِبُني لذَاتي ..

" بقيت أقول قوافي الأيام دي ^^ "

تُشْعِرُني بأنِّي صَغِيرتها ..
وأَشْعُر بأنَّها صَغِيرَتي ..

ما تَكَاد تَرَاهَا عَيْنََاي ..
حَتَّى أَفْرَحُ كَالطِفْلَةِ

نَتَعَانَقْ عِنَاقٌ طَويِلٌ ..
أَوَدُّ لَو يَتَوَقَّف الزَّمَان

وَنَظَل مُتَعَانِقِينَ لَلأبَد

أَشْعُر بِأَنِّي أَحْتَويهَا
وَبِأَنَّها تَحْتَويْني


نَتَحَدَّثْ مَعاً كَثِيراً
أَشْعُر بِرَاحَة شَدِيدَة بِالْقُربِ مِنْهَا

إِنْ غَابَتْ عَنْي أًفْتَقِدُها
فَهِيَ غَالِيَتي

أَدْعو الله أَنْ يُديْم عَلَيْنا هَذِهِ النِّعْمَةِ




مهما قلت ومهما كتبت بجد
مش هاقدر أوصف

ربنا يجمعنا في جنته
تحت ظلة

زي ما جمعنا في دنيته ..

ده شئ من اللي جوايا من ناحيتك :wub:

في مثل هذا اليوم 11/7/2009

وأنا قاعدة في المكتب في أمان الله .. تليفون المكتب رن ! .. افتكرت سيادة المدير بيطمئن على أحوال الرعية !
رديت كالعادة يعني .. لقيت هاجر أختي الصغيرة بتقول لي أيوه يا سامية .. انتي في الشغل ؟!
يا سبحان الله ذكية البنت دي :D هاكون فين يعني ؟!

قالت لي طيب خدي ماما معاكي أهي .. أيون يا ماما ؟ ..
أيوه يا سامية .. هتيجي بدري النهاردة ؟
مش عارفة يا ماما .. خير في حاجة ؟!

---------

حسيت في صوتها فرحة ..
بس الموضوع ده بالتحديد كان أبعد ما يكون عن ذهني !
لأنها لسه قايلة لي إمبارح إن معاد الولادة اتحدد يوم 23

--------

قالت لي .. أيون هبه في المستشفى وهتولد ..
ارتسمت ابتسامة منشكحة على شفتيًّ :D
بجد ؟!!
طيب هي فين ؟ في المستشفى ؟؟ طيب هي ولدت ؟؟
لأ .. محمد كلمني وقال إنها هتولد عالساعه 11 وقدامها للظهر !

طيب يا ماما هي في مستشفى إيه ؟
مش عارفة ؟
طيب يا ماما أما تولد كلميني !

دقائق ..

تررن تررن ..

استاذ فاروق أكيد !

الو ..
أيوه يا سامية .. ( العزيزة هاجر ) .. انتي هتيجي امتى ؟
معرفش ليه ؟
انتِ معرفتيش ؟؟
يابنتي ما هي ماما لسه مكلماني من شوية !!
طيب كلمي أسماء بقى وقوليلها .. :D

بعد شوية كلمت محمد .. قال لي لسه !
كلمتهم وقولتلهم يوافوني بكل جديد .. وأخبرتهم بفشلي في إخبار أسماء !

وإن شاء الله أشوف الوافد الجديد

بعد إنتهائي من حضور ندوة في مركز الدراسات الإشتراكية !!
ومحدش يسألني ده إيه !



--------------------------

صحيح من أيام كلمتني واحدة صاحبتي
قالت لي إن ربنا رزقها حلا يوم 7/6

ربنا يخليها لها .. وتكون بارة بيها إن شاء الله

عقبالكم جميعا ^^

أنا اللي فيا خير ولا اللي فيا شر

أصحابي واخدين عني فكرة إني طيبة !!
ومصممين على كده !!!!

مش عايزين يفهموا إنهم مخدوعين فيا بطريقة رهيبة ..
وإن جوايا شر مش طيبة !

.. حتى يوم ما فكرت أجيب الصورة بتاعة
Can you describe me in one word

وعملت لهم تاج ع الفيس بوك ..
نصهم داخل يقول
طــيــبة !!

أنا حاسة إني مش طيبة ..
بجد .. مش طيبة !

مش لأن الطيبة وحشة ..
بس لأن همه ميعرفونيش زي ما أنا عارفاني !

-----------------

ليه دايما بنتعامل بمبدأ
الحسنة تخص والسيئة تعم

ليه مش الحسنة تخص والسيئة برضه تخص !!

قلت الوداع .. وهو قال لي ليه !

مع الإعتذار لمطرب العواصف عمرو دياب ..

سنة و18 يوم .. منذ وطأت أقدامي هذ المكان .. بعد 7 أيام فقط من انتهائي من امتحانات الليسانس .. بداية حياتي العملية .. كانت في شركة للأستاذ فاروق بن محمد علي باشا سلامة .. شهدت لحظة ميلادها .. كنت سعيدة أيما سعادة بهذا .. كنا لازلنا متحيرين في اختيار اسم للمولودة ! إلى أن وقع اختياره على " بست تشويس " أو " الإختيار الأفضل " .. وإلى الأن لا يوجد خارج المكتب ما يدل على وجوده .. من يافطة أو أي اشارة .. كنت الوحيدة التي تعمل بهذه الشركة .. في البداية كان النشاط معروف .. ( استيراد اجهزة حاسب محمولة ) .. بعد الإنتهاء من أخر جهاز .. لم يعد لدينا نشاط محدد .. كنت أتعامل مباشرة مع العملاء .. أشعر بأهمية ما أفعل .. وكانت المسشولية كاملة ملقاة على عاتقي .. لكن منذ فترة ليست بالصغيرة .. توقفنا عن العمل .. كنت أشعر بالملل الشديد .. بالإضافة لمعرفتي بالأستاذ فاروق أكتر .. شعرت أنني لن أستطيع الإستمرار .. قررت ترك العمل .. وكان ذلك أثر جدال شديد تم بيننا .. وعندما فوجئ بذلك .. رأيت الوجه الأخر .. مماطلة في تنفيذ طلبي .. مع أنه كان من الممكن بكل بساطة ألا أعود مرة أخرى وأرسل له مفتاح المكتب .. لكن أخيرا .. فقط أيام معدودة .. وينتهي إرتباطي بهذا المكان .. من المؤكد أنني استفدت من هذه التجربة وخرجت منها بالكثير .. لكني خسرت أكثر .. أشعر بأني خسرت نفسي ! أخيرا .. لن أعد مجبرة على تذكر كل هذا الكم من البيانات .. سأنسى كل ما يخص هذا المكان .. جرين هاوس .. اتبكو .. مارين انترناشيونال .. يونايتد جروب .. أوراق محافظة القاهرة .. الضرائب .. التأمينات .. حجرة المكتب .. حجرة الإجتماعات .. مكتبي .. كل من عرفتهم في هذا المكان .. " أم صلاح .. البوابة " .. بناتها .. " رباب _ رحاب _ الصغيرة شهد " رفاق المترو .. الذين لم أعد أراهم كما في السابق .. بالأمس .. كان يتحدث معي .. عن قراري في ترك العمل .. وشعوره بأنني كنت سنده في هذا المكان .. لكن أبدله الله بمن هي أفضل مني .. أشعر بذلك .. لن أنسى أنه كان سببا في معرفتي بأشخاص أعتز بمعرفتهم .. عند علمهم برغبتي في ترك العمل .. طلبوا مني أن نبقى على اتصال .. أخيرا .. هذه أخر تدوينه من هذا المكان ..





المدونة مازالت مغلقة ^_^